Xabier Leteren musikan oinarrituz bidaia intimo bat proposatzen du Txori Kantazalek. Batetik, piano musika duen disko bat aurkezten dugu; eta, bestetik, liburu bat, Leteren mundu poetikoari eta diskoko musikari buruzko testu bat eskaintzen duena.

Diskoari dagokionez, Txori Kantazale ez da ohiko bertsio disko bat, baizik eta Leteren unibertso poetiko eta musikalean inspiratutako piano solo lan bat. Musikaren inspirazio iturri gisa, hainbat alorretatik edan du Otxoa de Alaizak. Batetik, noski, Leteren melodien oihartzunak daude hainbat piezatan. Bestetik, ordea, Leteren obrarekin harremanetan dauden musikek ere badute tokia. Lau iturri aipa daitezke bigarren ildo honetan: beste musikari batzuen doinuak, herri kantutegia, musika klasikoa eta bertsolaritza. Iturri horiek guztiak fusionatzen dituen lana da Txori Kantazale. Otxoa de Alaizak moldaketa orijinal eta ausartak egin ditu, pianoaren baliabideak modu apartekoan baliatuz. Joxan Goikoetxeak kolaboratu du akordeoiarekin bi abestitan, eta Alex Gurrutxagaren ahotsa entzun liteke, errezitazio sotil gisa, hiruzpalau piezatan.

Testuari dagokionez, saiakera literario bat eskaintzen du Gurrutxagak. Leteren obrari buruzko ideiak dakartza bere testura, modu zorrotz bezain pertsonalean. Horrez gain, Otxoa de Alaizaren pianoak Leteren obrarekin ezarri duen elkarrizketari ere begiratzen dio. Azken batean, bere hitzen bidez, elkarrizketa konplexu bat osatzen da pianoaren, Leteren obraren eta gure munduaren artean.

Manu Urbieta artistaren lanak ditu disko-liburuak. Bereak dira liburuaren eta diskoaren azaleko irudiak, eta baita liburuaren barruko ilustrazioak ere (jatorrizko obren kalitatezko erreprodukzio fotografikoak dira, Itziar Garaluzek eginak).